<HR style="COLOR: #e1e1e1" SIZE=1>
أطلبك يامن لك التصريف والقدره *** يالله يا من عقل يوسف على يعقوب
نسم علي نجنا من كل ما نكره *** يا واسع الجود فرج كربة المكروب
ثم قال بن مرشد الهاجس زغر بحره *** وبات يفقع بطيرانه شبيه النوب
عساك يا هاجسي باتطلق العبره *** واتحكم أقوال في فني رشق خرعوب
فيه الشمق والروق والكحل والحمره *** مروي سهب كنه الا في مصب مصبوب
زين التماثيل كنه من بني عذره *** او من عيال البتان اهل الشنق و اطنوب
اذا قبل يشرح الخاطر كما البكره *** طويلة العنق والراكب بها معجوب
يا بقلة الكبش خرفة من يحب عمره *** لي وضعش حكم التوضيع والتركوب
سمسر بحالي رحيم الخد والغره *** والعقل هاشه وخلانا كما المسلوب
راعي حبيشي على امتانه كما السفره *** أسود غدق كنه الا من صباغ ايوب
تطلاه سلكه مسالك زينة الخمره *** دوب المشط فيه يجري بالحلق معصوب
ساعه يفكه وساعه يركز الوفره *** وألقي من الفل عكثول الهوى مكثوب
والقي صفيح الذهب عالخد والخوره *** يأضي كما الشهر لي يطلع من الجلبوب
حسيبه الله يتقلب في الصوره *** كل يوم يلبس لنا عينه كساء مقلوب
عاشق و فني يحب الزين والظهره *** عاجله الحيك ما يلبس من المجلوب
وعاد عنده صغيره كنها الدره *** قد شل شاله ومثله في سهب وسيوب
صوبن قلبي والقن في الكبد وجره *** تطلع تناهيس تحرق خضرها وصلوب
وبعد يا من جينه مثل مالزهره *** والخشم خنجر رهيف الحد لي مشطوب
واعيونه اقلوت تشوي لا كلح نظره *** مثل المشاهيب يرمي شوفهن لقلوب
والنط محوي كما العجره في النخره *** وضروس بيضاء كما شخب اللبن محلوب
ومبسمه كنه زهرة فل في شجره *** ياضي كما البرق لي يلمع بروس اطهوب
ريقه دواء من يجيه الورد واالشبره *** مثل العسل لا شربته من وعاء اطنوب
والعنق فيه الذهب مرسي على نحره *** رصه برصه كما سبي العنب متبوب
والصدر كنه صرك صلحه بوشتره *** ميدان للخيل لي تدرج على لجنوب
وكعوب من شحوههن بايفلقن صدره *** كل يوم شو لاي يصبح منهن مقطوب
والخصر بالخمس بايحلقن عا خصره *** تقول طوعت محنش خوزران انبوب
والعجز حوضه علاء حتى تشل عشره *** تقول طوعه سرت معها طياب اهبوب
اذا احتزم لي وانا بتكي على العصره *** من فوق لوراك كنه طارحه لشبوب
وافخاذ لا شافهن عاشق ضوى قبره *** و لا تهيم وقلبه منهن مقطوب
سيقانه أدقال لا طالن ولا قصره *** واقدام به سبط ما في مشيهن مسيوب
كملت وصوفه عسى يسلم من السحره *** لي يصلبون الشجر لا شافهن مقهوب
لو لا خصيلة وقع في مله الكفره *** مالكه كافر ولبعد قال يا مطلوب
جني من الجن لا عزه و لا نصره *** و لا السميطة تقع له ياعرب مركوب
لكنه الله عطاه اياه له سخره *** مدت حياه وما في الاخرة ملهوب
يا ريت ذا الزين يسلم يمتحي وزره *** ياخذه دوله ويمسي في منيع اغلوب
يحكم ويرسم على ارض الهند والبصره *** وارض اليمن كلها والمسكتي وعتوب
هو دوب يحكم وانا باسير في امره *** باتبعه في ما حكم به صدق و الا كذوب
ياريتنا في صلاحه واخدمه سخره *** لجل النظر فيه والمجلس ضحك وطروب
لا حلله لي نكش اصواب مجتبره *** وامسيت عالج صوابي كننا مضروب
زام الهوية عبر والعشق والصغره *** يوم البقش في ثباني من صرر وعصوب
اقنص غصيني وهو مكنون في حجره *** شال الشبك للقناصه والكلب وقطوب
واليوم شيبه كسرت الناب والسبره *** والقل خلاني تصبر منهن مغصوب
لا حل للفقر لي هو يكسر النعره *** و لابدا قالوا إن فقري وقع محبوب
والزين ما نساه لو قدنا في الحفره *** والزين حبه وعاد القلب به ملبوب
من لا يحب لكواعب ريت له فره *** ما يصلح الا يبت في مطبخه مشغوب
بشكي ظلومي على من شعر في الصغره *** عاصدر يعرف ويفهم للكرم ومجروب
من ذري كنده تربوا تحت با شجره *** وادي خريخر يسمى الوادي المهيوب
عالميم والحاء وحرف السين به نصره *** والنون صيته بلغ لا شرقها وغروب
ورخت بالحد واربع تعشر بالهجره *** شهر المسمى ربيع الثاني المهيوب